У РАЙВЫКАНКОМЕ

Палітычныя баталіі ўспыхваюць не толькі на плошчах у Мінску і іншых буйных гарадах краін СНД, яны пагражаюць захапіць і глыбінку. Сапраўды, чым горшыя сельскія жыхары за гараджан? Уваход у палітыку нікому не забаронен. Мітынгуй, бастуй, патрабуй адстаўкі ўрада ці якіх іншых мер, абы не даваць застойвацца жыццю.

Вось і ў нашым раёне нядаўна была створана ініцыятыўная група з 28 чалавек, якая звярнулася ў выканком райсавета з просьбай зарэгістраваць яе, каб правесці раённы рэферэндум па пытанню: «Ці лічыце вы неабходным датэрміновае спыненне (роспуск) Глускага раённага Савета народных дэпутатаў ў сувязі з недаверам і правядзенне новых выбараў дэпутатаў у раённы Савет восенню 1992 года?»

Гэтая заява была накіравана для разгляду пастаяннай камісіі раённага Савета народных дэпутатаў па законнасці, правапарадку, барацьбе са злачыннасцю і правах грамадзян. Вось што заявіў яе старшыня дэпутат райсавета Л. М. Рамановіч:

— Закон Рэспублікі Беларусь «Аб народным галасаванні (рэферэндуме) у Рэспубліцы Беларусь» у артыкуле 1 вызначае, што мясцовыя рэферэндумы праводзяцца па пытаннях развіцця адпавбднай тэрыторыі. Далей, у артыкуле 3 да сказанага зроблена дапаўненне, што на мясцовы рэферэндум могуць выносіцца пытанні, якія маюць найбольш важнае значэнне для насельніцтва адпаведных адміністратыўна-тэрытарыяльных утварэнняў і аднесеныя да кампетэнцыі адпаведных Саветаў народных дэпутатаў. У артыкуле 10 вышэй названага Закона гаворыцца, што «выносімае на рэферэндум пытанне павінна быць сфармулявана ініцыятыўнай групай дакладна і ясна з тым, каб на яго быў магчымы адназначны адказ».

Што ж мы маем на справе? У фармулёўцы пытання, уносімага на рэферэндум ініцыятыўнай групай, такой адназначнасці няма. Практычна ў ёй ставяцца два пытанні, на якія адназначнага адказу можа і не быць. Першае пытанне такое: «Ці лічыце вы неабходным датэрміновае спыненне (роспуск) Глускага раённага Савета народных дэпутатаў у сувязі з недаверам?» і другое пытанне «... і правядзенне новых выбараў дэпутатаў у раённы Савет восенню 1992 года?». А можа распусціць Савет і не выбіраць новы? А калі выбіраць, то чаму абавязкова восенню, а не зімой ці вясной?

Згодна артыкула 19 Закона Рэспублікі Беларусь «Аб мясцовым самакіраванні і мясцовай гаспадарцы ў Рэспубліцы Беларусь» на рэферэндум можа выносіцца пытанне аб даверу (недаверу) мясцоваму Савету. А пастанову аб роспуску мясцовага Савета, аб назначэнні новых выбараў, вызначэнні тэрмінаў правядзення выбараў у гэты Савет прымае Вярхоўны Савет Рэспублікі Беларусь на падставе заключэння спецыяльна ўтворанай камісіі.

Улічыўшы ўсе гэтыя абставіны, члены нашай пастаяннай камісіі прыйшлі да высновы, што ўключэнне ў рэферэндум пытання патрабаванняў аб роспуску мясцовага Савета і правядзенні новых выбараў дэпутатаў у вызначаны ініцыятыўнай групай тэрмін неправамерна. Прапанаваная на рэферэндум фармулёўка пытання не адпавядае патрабаванням дзеючага заканадаўства.